Një stuhi dimri, e cila tashmë ka mbuluar me borë një pjesë të jugut të Shteteve të Bashkuara, të premten lëvizi drejt verilindjes, duke shkaktuar pengesa ndaj fluturimeve dhe duke bërë që nxënësit të mos shkojnë në disa shkolla një ditë.
Shkollat në Boston u mbyllën, shkollat publike në Providence dhe Rhode Island e zhvilluan mësimin nga distanca, ndërsa sistemi i shkollave publike në Nju Jork nuk u mbyll, shkruan Associated Press.
“Fëmijët duhet të jenë në shkollë. Nuk kemi më ditë për të humbur” pas shumë ditëve të mbylljes e me mësim nga distanca në pandemi, tha kryetari i Nju Jorkut, Eric Adams.
Kompanitë ajrore kanë anuluar më shumë se 2.600 fluturime. Më së shumti fluturime janë anuluar në aeroportet në zonat e Bostonit dhe Nju Jorkut, sipas shërbimit për përcjelljen e fluturimeve, “FlightAware”.
Deri në kohën kur stuhia filloi të qetësohej të premten pasdite dhe dielli rrezoi në disa zona, në një pjesë të Anglisë së Re u regjistruan reshje bore deri në 30 centimetra ose më shumë, përfshirë 35.5 centimetra borë në Ëestëood.
Drejtuesve të automjeteve iu bë thirrje që ta shmangin qarkullimin në trafik, por në rajon pati raportime për aksidente. Një drejtues automjeti vdiq në Massachusetts, kur vetura doli nga rruga, tha policia shtetërore.
