Më shumë se 50,000 të mitur të pashoqëruar u zhdukën nga qendrat e azilit në Evropë në tre vitet e mëparshme kalendarike, sipas një studimi të grupiy ndërkombëtar gazetaresk Lost in Europe.
Ky studim tregon se bëhet fjalë për “të rinj të cenueshëm që rrezikohen të bëhen viktima të trafikimit të qenieve njerëzore dhe skllavërisë”, raporton agjencia belge e lajmeve Belga.
Të dhënat nga vendet evropiane të mbledhura nga grupi Lost in Europe tregojnë se nga viti 2021 deri në vitin 2023 janë regjistruar 51,433 zhdukje, ndërsa nga viti 2018 deri në vitin 2020 ishin afër 18,000.
Numri aktual i personave të zhdukur është ndoshta shumë më i lartë, pasi vetëm 13 nga 31 vendet nga të cilat u kërkuan ata dhanë të dhëna specifike.
Më së shumti të mitur u zhdukën në Itali (22,899) dhe Austri (20,077), pasuar nga Belgjika (2,241), Gjermania (2,005) dhe Zvicra (1,226). Të dhënat nuk ishin të disponueshme nga vendet kryesore si Greqia dhe Polonia.
Autoritetet belge bëjnë me dije se të dhënat i referohen zhdukjeve të raportuara, si rezultat i të cilave është e mundur që i njëjti person të shfaqet më shumë se një herë, si dhe të jenë kryesisht të rinj nga Afganistani, por edhe nga Algjeria, Eritrea, Etiopia dhe Maroku.
Komisionerja Evropiane për Çështjet e Brendshme Ilva Johansson tha për kolektivin Lost in Europe se 40,000 të mitur të pashoqëruar hynë në Evropë vitin e kaluar dhe se ka një “rritje të madhe” në lëvizjen e tyre midis vendeve anëtare të BE.
