Fjalët fyese mund të lënë plagë të thella. Një studim i ri i publikuar në revistën shkencore BMJ Open tregon se abuzimi verbal në fëmijëri mund të ketë ndikim në shëndetin mendor po aq sa abuzimi fizik.
Studiuesit analizuan të dhëna nga më shumë se 20,000 të rritur në shtatë studime të ndryshme në Angli dhe Uells. Ata zbuluan se personat që kishin përjetuar abuzim fizik gjatë fëmijërisë kishin një rrezik 50% më të lartë për të raportuar probleme me shëndetin mendor në moshë madhore, krahasuar me ata që nuk kishin përjetuar abuzim. Ndërkohë, ata që kishin përjetuar abuzim verbal kishin një rritje 60% të mundësive për mirëqenie të ulët mendore.
“Rezultatet sugjerojnë që abuzimi verbal në fëmijëri mund të lërë plagë në shëndetin mendor po aq të thella dhe afatgjata sa ato të shkaktuara nga abuzimi fizik”, u shpreh autori i studimit, Dr. Mark Bellis, profesor i shëndetit publik në Universitetin Liverpool John Moores në Mbretërinë e Bashkuar.
Studimi tregoi gjithashtu se përhapja e abuzimit fizik në Angli dhe Uells ka rënë ndjeshëm nga 20% për ata të lindur në vitet 1950–1979, në 10% për ata të lindur në ose pas vitit 2000. Nga ana tjetër, abuzimi verbal është në rritje.
Në SHBA, më shumë se 60% e të rinjve që morën pjesë në një anketë nga Qendrat për Kontrollin dhe Parandalimin e Sëmundjeve (CDC) raportuan se kishin përjetuar abuzim emocional, ndërsa 31.8% kishin përjetuar abuzim fizik.
