Presidenti gjerman, Frank-Walter Steinmeier i kujtoi vendit mësimet e nxjerra nga Lufta e Dytë Botërore, në një fjalim të rëndësishëm sot, ndërsa Gjermania përkujtoi 80-vjetorin e përfundimit të luftës në Evropë dhe rënien e diktaturës naziste.
“Ne e dimë se ku çon izolimi, ku çon nacionalizmi agresiv dhe përbuzja për institucionet demokratike. Ne e kemi humbur tashmë demokracinë një herë në Gjermani”, tha Steinmeier në një fjalim para Dhomës së Ulët të parlamentit të Gjermanisë, Bundestag, ku morën pjesë diplomatë të huaj me seli në Berlin.
“Le të besojmë në përvojën tonë! Le të mbrojmë vlerat tona. Le të mos ngrijmë nga frika”, tha ai.
Presidenti theksoi se 8 maji është bërë qendror për identitetin e të gjithë Gjermanisë.
“Sot gjermanët nuk kanë më nevojë të pyesin nëse 8 maji përfaqësonte çlirimin. Por ne pyesim: si mund të mbetemi të lirë?”, shtoi ai.
Steinmeier vuri në dukje se Shtetet e Bashkuara aktualisht po vinin në pikëpyetje rendin ndërkombëtar të ndërtuar pas Luftës së Dytë Botërore.
Ai tha se politikat e Uashingtonit dhe pushtimi në shkallë të plotë i Ukrainës nga Moska shënuan një “ndarje të dyfishtë me historinë”.
“Lufta e agresionit e Rusisë dhe shkelja e vlerave nga Amerika shënojnë fundin e këtij shekulli të gjatë të XX”, tha ai.
Steinmeier tha se magjepsja me autoritarizmin dhe tundimet populiste po fiton terren edhe në Evropë.
Presidenti gjerman shprehu shqetësim për rritjen e forcave ekstremiste në vend.
“Këto forca tallen me institucionet e demokracisë, helmojnë debatet, luajnë me frikën e njerëzve, tregtojnë me frikën dhe nxisin njerëzit kundër njëri-tjetrit”, tha ai.
“Kushdo që dëshiron të mirën për këtë vend duhet të mbrojë bashkëjetesën, kohezionin dhe pajtimin paqësor të interesave. E pres këtë nga të gjithë demokratët në këtë vend”, tha Steinmeier, fjalimi i të cilit u shoqërua me duartrokitje të zgjatura në Bundestag.
