Ka përfunduar dhënia e dëshmive nga 126 dëshmitarët e Prokurorisë së Specializuar në rastin ndaj Hashim Thaçit, Kadri Veselit, Rexhep Selimit dhe Jakup Krasniqit. Analistët në edicionin special në RTK kanë listuar shkeljet e të drejtave të njeriut gjatë këtij procesi gjyqësor.
Avokati Artan Çerkini ka vlerësuar se stërzgjatja e procesit duhet t’iu atribuohet gjykatësit të procedurës paraprake dhe jo trupit gjykues. Ai ka thënë se ka qenë i pakuptimtë zgjatja për dy vjet e procesit të këmbimit të provave mes prokurorisë dhe mbrojtjes.
“Kjo pjesë e administrimit gjyqësor është dashur të kryhet së paku për gjashtë muaj, e sidomos duke pasur parasysh faktin që të pandehurit kanë qenë në paraburgim. Kur ata janë në paraburgim, procedura duhet të zhvillohet me shpejtësi më të madhe sesa kur ata mbrohen në liri. Po bëhen katër vjet e gjysmë prej kur ata janë në paraburgim. Për mendimin tim, këtu është cënuar edhe prezumimi i pafajësisë, sepse kur dikush mbahet në kohë të gjatë në paraburgim, ai tashmë prezumohet i fajshëm,” ka thënë Çerkini.
Kadri Kryeziu, profesori universitar për të drejtat e njeriut, tha se gjatë procesit janë shkelur disa të drejta të të pandehurve. Një nga to, ai ka veçuar mbajtjen në paraburgim për kohë të gjatë.
“Luftëtarëve të lirisë dhe familjarëve të tyre u janë shkelur të drejtat dhe liritë. Një e drejtë e sanksionuar me ligj është se ata i kanë mbajtur në paraburgim aq sa nuk duhet të rrinë. Arsyet mund të jenë politike, por as kushtetuese, as ligjore, as njerëzore,” ka thënë Kryeziu.
Deputeti i sapozgjedhur nga PDK, Artan Behrami, ka kritikuar cilësinë e gjykimit duke përmendur mosnjohjen e identitetit të dëshmitarëve të mbrojtjes deri një apo dy ditë para procesit.
“Të gjitha vendimet që ka marrë deri sot, nga prolongimi i procesit deri te mbajtja kundërligjshëm dhe kundër Konventave Evropiane në paraburgim të krerëve të UÇK-së, i ka marrë me motive politike. Deri te lirimi i presidentit Thaçi për babain e tij, ka qenë i motivuar politikisht,” ka thënë Behrami.
