Spanja ka shtuar kundërshtimin e saj ndaj luftës SHBA-Izrael kundër Iranit duke mbyllur hapësirën e saj ajrore për avionët amerikanë të përfshirë në sulme, duke nënvizuar pozicionin e saj si kritiku kryesor i konfliktit në Evropë.
Lëvizja, e raportuar për herë të parë nga gazeta El País dhe e konfirmuar nga ministri i mbrojtjes të hënën, vjen pasi Madridi tha se SHBA-të nuk mund të përdorin baza ushtarake të operuara bashkërisht në vendin jugor të Evropës për operacione që lidhen me luftën.
“Ne nuk autorizojmë as përdorimin e bazave ushtarake dhe as përdorimin e hapësirës ajrore për veprime që lidhen me luftën në Iran ”, u tha gazetarëve ministrja Margarita Robles, citon Guardian.
“Mendoj se të gjithë e dinë qëndrimin e Spanjës. Është shumë i qartë”, shtoi ajo, duke e quajtur luftën “thellësisht të paligjshme dhe thellësisht të padrejtë”.
Mbyllja do t’i detyrojë aeroplanët ushtarakë, përfshirë ata me bazë në Mbretërinë e Bashkuar dhe gjetkë në Evropë , të anashkalojnë Spanjën gjatë rrugës për në objektiva në Lindjen e Mesme, përveç në raste emergjence.
Kryeministri i Spanjws, Pedro Sanchez sinjalizoi lëvizjen e fundit kur i tha kongresit spanjoll javën e kaluar: “Ne ia kemi mohuar SHBA-së përdorimin e bazave në Rota dhe Moron [de la Frontera] në këtë luftë të paligjshme. Të gjitha planet e fluturimit që lidhen me luftën në Iran janë refuzuar, përfshirë fluturimet e furnizimit me karburant.”
Avionët ushtarakë amerikanë mund të vazhdojnë të përdorin bazat brenda kushteve të një marrëveshjeje dypalëshe, siç është ofrimi i mbështetjes logjistike për 80,000 forcat amerikane të bazuara në Evropë.
