Kryetari i LDK-së, Lumir Abdixhiku, ka reaguar sërish për skandalin e granteve në Ministrinë e Bujqësisë, ku familjarë të deputetes së pushtetit, Fitore Pacolli, u zbulua se kanë marrë grante në vlerë 100 mijë euro.
Abdixhiku ka thënë se ata që kanë futur duart në pasurinë e qytetarëve të Kosovës, do t’i kthejnë ato para cent më cent.
“Kam takuar bujq që punojnë një vit të tërë për t’i humbur produktet e bëra me mund e me zemër dhe këta bujq nuk kanë vëllezër e motra në Qeveri për t’i marrë 100 mijë euro grant për katër ditë. Nuk kanë as shokë në ministri për ti marrë. Bujqit e Kosovës nuk duhet të kenë një shtet që edhe i vjedhë, edhe i shkelë dhe paturpësisht i shikon në sy pa pendesë. Unë kam një mesazh për ata që kanë futur duart në pasurinë e qytetarëve të Kosovës: Do t’i ktheni ato para cent më cent”, ka thënë Abdixhiku në një tubim në Fushë Kosovë.
Ditëve të fundit është raportuar për favorizime me grante nga Ministria e Bujqësisë.
Ministri i Bujqësisë, Pylltarisë dhe Zhvillimit Rural, Faton Peci, e ka hapur “kuletën e Ministrisë” në muajt e fundit të mandatit të tij, duke ndarë shuma të majme. 100 mijë euro në formë granti i janë dhënë vëllait të deputetes së Vetëvendosjes, Fitore Pacollit për një shtallë, e 50 mijë tjera i janë ndarë një bashkëpartiaku të tij për ndërtimin e disa villave.
