Sindikata e Punëtorëve të RTK-së ka kërcënuar me padi institucionet shtetërore, nëse nuk realizohen pagat deri të enjten.
Në një njoftim për media të hënën, SPERTK tha se ka angazhuar një avokat për inicimin e procedurave ligjore nëse pagat e punonjësve të RTK-së nuk ekzekutohen brenda tri ditëve.
“Ashtu siç ju kemi paralajmëruar, nëse deri të enjten nuk dalin pagat, Sindikata e Punëtorëve të RTK-së do të nisë procedurën ligjore përmes padive në gjykatë”, tha Sindikata në një deklaratë.
“Për këtë qëllim, kemi angazhuar z. Yll Zekaj nga Shoqëria e Avokatëve ‘DeJure Law Firm’, i cili do të përfaqësojë punëtorët e RTK-së. Angazhimi i tij është pro bono, duke ofruar ndihmë ligjore falas për të gjithë punëtorët”, thuhet në deklaratë.
Punonjësit e RTK-së nuk i kanë dy pagat e fundit për shkak të moskonstituimit të Kuvendit të Kosovës dhe pamundësisë së miratimit të buxhetit për RTK-në për gjashtëmujorin e dytë.
