Pas famës së papritur që mori kur fotografia e tij e arrestimit pushtoi internetin dhe i solli nofkën “i burgosuri më i pashëm në botë”, Jeremy Meeks ka bërë një rrugëtim të pabesueshëm – nga qelia e burgut në botën e modës dhe të famës. Historia e tij mbetet një nga transformimet më të jashtëzakonshme në industrinë e argëtimit.
Gjithçka filloi në vitin 2014, kur Policia e Stockton-it publikoi në Facebook fotografinë e tij nga arrestimi. Sytë e kaltër të thellë dhe tiparet e përsosura të fytyrës e kthyen menjëherë në një sensacion viral. Brenda pak orësh, fotografia e tij mori dhjetëra mijëra pëlqime dhe komente, duke e bërë të famshëm ndërkohë që ndodhej ende pas hekurave.
Në atë kohë, askush nuk mund ta kishte imagjinuar se burri që përballej me akuza për armëmbajtje pa leje, një ditë do të ecë në pasarelat e markave të njohura si Philipp Plein dhe Tommy Hilfiger, do të luajë në filma dhe do të nënshkruajë kontrata me vlerë miliona dollarëshe.
Përpara se të bëhej i njohur, jeta e Meeks ishte larg çdo shkëlqimi. Ai ka folur hapur për fëmijërinë e tij të vështirë, në një intervistë të vitit 2019 në podcastin What’s Your Water.
“Të dy prindërit e mi ishin të varur nga heroina. Unë linda me varësi nga heroina…Fëmijëria ime ishte shumë e errët. Babai im vrau mikeshën më të mirë të nënës sime kur unë isha vetëm nëntë muajsh”, rrëfeu ai.
Pas më shumë se një dekade përballjesh me ligjin për vepra si vjedhje të mëdha dhe falsifikime, arrestimi i vitit 2014 i solli një dënim prej 27 muajsh burg. Por kur doli i lirë në vitin 2016, gjithçka ndryshoi.
Sot, në moshën 41-vjeçare, Jeremy Meeks është pothuajse i panjohshëm nga e kaluara e tij. Pamja e tij tërheqëse mbetet e njëjtë, por tani ai është pjesë e botës së modës dhe industrisë së argëtimit.
Pas daljes nga burgu, ai nënshkroi kontratë me agjencinë White Cross Management. “Jam në një pikë të jetës ku mund të siguroj familjen time dhe të ndryshoj jetën time në mënyrë të vërtetë”, deklaroi ai për ABC – dhe këtë e ka bërë realitet.
Që nga ajo kohë, ai ka sfiluar në pasarela ndërkombëtare, ka luajtur në disa filma si Trigger, Secret Society, dhe True to the Game 2 e 3. Po ashtu, ka nënshkruar një kontratë prej 15 milionë dollarësh me kompaninë Fashion Concept GmbH për të nisur linjën e tij të modës.
Foto: Getty Images
Në vitin 2024, Meeks publikoi edhe autobiografinë e tij Model Citizen: The Autobiography of Jeremy Meeks. “Jam në një fazë të jetës ku ndihem i hapur dhe i sinqertë. Dua të tregoj historinë time – të plotë – me shpresën që njerëzit të lidhen me të”, tha ai me rastin e botimit të librit.
Jashtë kamerave, Jeremy Meeks është baba i dy djemve: Jeremy Jr., nga martesa e tij e mëparshme me Melissën, dhe Jayden, që ka me trashëgimtaren e Topshop, Chloe Green, me të cilën ka qenë në lidhje për dy vjet.
Vitin e kaluar, ai konfirmoi se është beqar, duke thënë për People: “Jam vetëm. Po përqendrohem tek vetja”.
