Kandidati për Kryetar të Komunës së Lipjanit nga radhët e PDK-së, Shukri Buja, ka vizituar sot vendpunishtet e Kompleksit “Grand Tower” në zonën e Prishtinës së Re, ku u prit nga Mustaf Gashi, pronar i kompanisë ndërtimore “M.Gashi ShPK” – një ndër kompanitë më të mëdha të ndërtimit me bazë në Lipjan.
Gjatë vizitës, Buja vlerësoi kontributin e kësaj kompanie në zhvillimin ekonomik të komunës, veçanërisht përmes punësimit të një numri të madh të punëtorëve nga Lipjani. Ai e cilësoi këtë biznes si shembull të suksesit vendor që kontribuon drejtpërdrejt në mirëqenien e shumë familjeve lipjanase.
“Në mandatin tim si kryetar, hartat zonale nuk do të miratohen në zyrë pa konsultim me sektorin privat,” deklaroi Buja.
“Ne do të kemi një proces të hapur dhe të drejtë, ku zëri i bizneseve dhe qytetarëve do të dëgjohet.”
Ai theksoi se qeverisja e tij do të jetë larg ndërhyrjeve politike në sektorin e ndërtimit.
“Nuk do të ketë vend për ndikime politike në vendimet që prekin bizneset dhe zhvillimin urban. Do të udhëhiqemi nga ligji dhe interesat e qytetarëve.”
Duke folur për kapacitetet komunale, Buja tha se stafi profesional komunal do të fuqizohet me trajnim dhe përkrahje të vazhdueshme, që të jenë në shërbim të bizneseve dhe qytetarëve,e jo pengesë për ta.
Në lidhje me të drejtat e punëtorëve në sektorin e ndërtimit, ai u shpreh: “Do të punojmë që të ngrihen standardet në ndërtim, duke e vënë theksin te siguria dhe shëndeti në vendin e punës. Punëtori duhet të jetë i mbrojtur dhe i respektuar.”
Buja gjithashtu shtoi se prioritet do të jetë edhe banimi i përballueshëm për qytetarët. “Bashkë me zhvillimin, duhet të sigurojmë që qytetarët tanë të kenë mundësi për banim të qëndrueshëm dhe me çmime të arsyeshme. Ky është obligimi ynë.”
“Ky është ndryshimi që e meritojnë punëtorët, bizneset dhe çdo qytetar i komunës sonë,” përfundoi Buja, duke theksuar se “fitorja është e jona!”
