Lista Serbe ka reaguar pas shpërthimit të fuqishëm që ndodhi pas mesnate në veri të Mitrovicës, në lagjen “Tre Rrokaqiejt”.
Partia serbe ka thënë se ky shpërthim është bërë më qëllim për të arsyetuar praninë e Njësisë Speciale të Kosovës në veri.
“Në emër të popullit serb, dënojmë ashpër incidentin që ndodhi mbrëmë kur persona të panjohur hodhën shok-bombë pranë lagjes “Tre Rrokaqiejt” në veri të Mitrovicës dhe shkaktuan shqetësimin e qytetarëve tanë. Hedhja e fishekzjarrëve apo mjeteve të ngjashme piroteknike nuk është krim në vetvete, por ajo që na shqetëson është se falsifikimi i incidenteve të tilla synon të krijojë alibi për praninë e forcave speciale të Kurtit në mjediset serbe, dhe represionin e vazhdueshëm ndaj popullit tonë, si dhe arrestime të pabaza”, thuhet në reagimin e tyre.
Lista Serbe ka kërkuar nga KFOR-i dhe EULEX-i që të forcojnë praninë e tyre në veri të Kosovë, veçanërisht në veri të Mitrovicës, siç kanë thënë ata për të “parandaluar këto incidente të sajuara”.
Policia e Kosovës ka konfirmuar se mbrëmjen e kaluar ka ndodhur një shpërthim që dyshohet si ishte shok-bombë në këtë pjesë të Mitrovicës së Veriut.
