Atë që e kishte siguruar javë më parë, Shkëndija e Tetovës e ka konfirmuar të enjten mbrëma.
Kampionia e Maqedonisë së Veriut, do të paraqitet në fazën e ligës të Ligës së Konferencës, pasi nuk ia doli mbanë në Ligën e Evropës.
Shkëndija, të enjten mbrëma u eliminua në fazën “play-of” të Ligës së Evropës nga Ludogoretsi i Bullgarisë me rezultatin e përgjithshëm 5:3.
Pas fitores javën e shkuar 2:1 në ndeshjen e parë në Shkup, Shkëndija në duelin e kthimit u mposht 4:1 në Bullgari.
Koha e rregullt e takimit përfundoi 2:1 për Ludogoretsin, ekip që shënoi edhe dy gola tjerë në dy vazhdimet nga 15-të minuta për të siguruar Ligën e Evropës.
Përkundër eliminimit nga kjo garë, Shkëndija ka arritur sukses të jashtëzakonshëm pasi për herë të parë në histori të klubit do të paraqitet në njërën prej garave të UEFA-s, saktësisht fazën e ligës të Ligës së Konferencës.
