Shitja e sulmuesit shqiptar Armando Broja drejt Burnley-t ka çuar në 295 milionë euro shumën që Chelsea ka arkëtuar nga shitjet e lojtarëve të dalë nga akademia e saj në vetëm tre vitet e fundit, raporton BBC.
Klubi londinez ka ndërtuar prej kohësh një model të fuqishëm për zhvillimin e talenteve, duke prodhuar lojtarë që jo vetëm kanë kontribuar në ekipin e parë, por kanë sjellë edhe përfitime të mëdha financiare. Broja, i cili u rrit në akademinë e Chelseat dhe debutoi në Premier League, është vetëm shembulli më i fundit i këtij procesi fitimprurës.
Në listën e këtyre shitjeve përfshihen emra si Mason Mount (Manchester United), Tammy Abraham (Roma), Fikayo Tomori (Milan) dhe Callum Hudson-Odoi (Nottingham Forest), të cilët kanë siguruar shifra të larta transferimesh.
Strategjia e klubit ka qenë e qartë: rritja e talenteve në shtëpi dhe shitja e tyre në kohën e duhur, duke balancuar financat dhe respektuar rregullat e Fair Play Financiar, ndërkohë që investohet në përforcime të reja për skuadrën e parë.
Shitja e Brojës, e kombinuar me operacionet e tjera në merkato, tregon se Chelsea po vazhdon të kapitalizojë fuqinë e akademisë së saj, duke e bërë atë një nga asetet më të rëndësishme të klubit në aspektin sportiv dhe ekonomik.
