Negociatorët nga Shtetet e Bashkuara ushtronin presion mbi Kyiv-in, duke kërkuar qasje në mineralet e Ukrainës.
Negociatorët amerikanë po shqyrtojnë shkëputjen e Ukrainës nga sistemi i internetit satelitor Starlink i Elon Musk nëse Ukraina nuk pajtohet me kushtet e tyre.
Lajmi u bë i ditur nga agjencia Reuters, duke iu referuar tre burimeve me dijeni për këtë çështje.
Sipas burimeve të Reuters, negociatorët nga Shtetet e Bashkuara ushtronin presion mbi Kyiv-in, duke kërkuar qasje në mineralet e Ukrainës.
Si një nga levat e presionit, konsiderohet mundësia e shkëputjes së vendit nga Starlink.
“Qasja e vazhdueshme e Ukrainës në Starlink, në pronësi të SpaceX, u ngrit në bisedimet midis zyrtarëve amerikanë dhe ukrainas pasi presidenti ukrainas Volodymyr Zelensky refuzoi propozimin fillestar të Sekretarit amerikan të Thesarit Scott Bessent”, shkruan agjencia britanike.
Kjo çështje u ngrit sërish gjatë një takimi mes Përfaqësuesit Special të SHBA-ve për Ukrainën dhe Rusinë, Keith Kellogg dhe Zelensky.
Gjatë takimit, Ukrainës iu tha se do të përballej me mbylljen e pashmangshme të shërbimit nëse nuk nënshkruante një marrëveshje minerale, tha një burim për Reuters.
Administrata e Donald Trump vendosi kushte për marrëveshjet minerale të Ukrainës, të cilat zakonisht vendosen mbi vendet agresore që janë mundur në luftë.
Kushtet e kësaj marrëveshjeje i tejkalojnë shumë reparacionet e vendosura ndaj Gjermanisë dhe Japonisë pas Luftës së Dytë Botërore.
Presidenti Zelensky e hodhi poshtë propozimin e SHBA-ve sepse marrëveshja nuk kishte garanci të qarta sigurie nga Shtetet e Bashkuara.
Sekretari amerikan i Shtetit Marco Rubio tha se Trump ishte i mërzitur për shkak të mungesës së mirënjohjes për ndihmën amerikane dhe refuzimit për të nënshkruar një marrëveshje për mineralet e Ukrainës.
