Sipas një raporti nga SHBA, administrata e presidentit Donald Trump po shqyrton mundësinë e tërheqjes së disa mijëra trupave amerikane nga Koreja e Jugut dhe zhvendosjes së tyre në vende të tjera në rajonin Indo-Paqësor.
Megjithëse ideja thuhet se është vetëm një nga disa që diskutohen nga zyrtarë të lartë amerikanë, ajo ka tërhequr vëmendjen sepse përkon me një debat në rritje në SHBA për zgjerimin e fleksibilitetit strategjik të forcave amerikane në Kore (USFK), shkruan Wall Street Journal (WSJ).
WSJ raportoi dje se Pentagoni po zhvillon një opsion për të tërhequr rreth 4,500 trupa dhe për t’i zhvendosur ato në vende të tjera në rajonin Indo-Paqësor, duke përfshirë Guam, duke cituar zyrtarë të mbrojtjes.
Idetë po përgatiten si pjesë e një rishikimi jozyrtar të politikës së Koresë së Veriut.
Megjithatë, siç raporton WSJ, propozimi duket se nuk i është paraqitur drejtpërdrejt Trumpit ende dhe mbetet një nga disa koncepte që diskutohen nga zyrtarë të lartë.
Një zëdhënës i Pentagonit tha se “nuk kishte njoftime mbi strategjinë” kur u pyet për një reduktim të mundshëm të trupave.
Zëdhënësi i Këshillit të Sigurisë Kombëtare Pete Nguyen nuk diskutoi drejtpërdrejt tërheqjen e trupave, por tha se “denuklearizimi i plotë” i Koresë së Veriut mbetet angazhimi i Trumpit.
Ndryshe, që nga mandati i tij i parë, Trump ka vënë vazhdimisht në dyshim nevojën për rreth 28,500 trupa amerikane të stacionuara në Korenë e Jugut.
Ai vazhdimisht ka kërkuar që qeveria e Koresë së Jugut të paguajë më shumë për praninë ushtarake të SHBA-së dhe ka përdorur reduktimin ose tërheqjen e trupave si një mjet negociues.
