Ky vendim vjen në kuadër të një qasjeje më të theksuar të politikës “Amerika së Pari”, që synon grumbullimin e rezervave ushtarake brenda SHBA-ve.
Shtetet e Bashkuara kanë nisur të pezullojnë në heshtje disa shitje armësh ndaj vendeve aleate në Evropë, përfshirë sistemin e njohur të mbrojtjes ajrore Patriot, sipas revistës amerikane The Atlantic.
Ky vendim vjen në kuadër të një qasjeje më të theksuar të politikës “Amerika së Pari”, që synon grumbullimin e rezervave ushtarake brenda SHBA-ve, në një kohë të rritjes së pasigurisë globale.
Sipas artikullit, rasti i parë i dukshëm i këtij ndryshimi ndodhi kur Danimarka po negocionte blerjen e një sistemi të avancuar mbrojtës, me vlerë miliarda dollarë.
Fillimisht, palët amerikane dhe franceze ishin aktive në bisedime. Por, ndërsa data e vendimit afrohej, Pentagoni tërhoqi papritur interesin nga marrëveshja, duke i lënë palët e tjera të habitura.
The Atlantic citon dy zyrtarë të administratës amerikane, të cilët konfirmojnë se zëvendës sekretari i Mbrojtjes, Elbridge Colby, gjatë një telefonate me Departamentin e Shtetit, shprehu dyshime për vlerën strategjike të disa shitjeve ushtarake jashtë vendit.
