Ushtria e Shteteve të Bashkuara filloi stërvitjet shumëpalëshe me aleatët e saj filipinas dhe partnerë të shumtë ndërkombëtarë të hënën, mes tensioneve në rritje midis Manilës dhe Pekinit për mosmarrëveshjet territoriale në Detin e Kinës Jugore.
Aktiviteti i Trajnimit Detar “Sama Sama 2023” është përsëritja e shtatë dhe më e madhe e stërvitjeve, pasi pjesëmarrës nga Australia, Kanadaja, Franca, Japonia, Mbretëria e Bashkuar dhe Malajzia i bashkohen ShBA-së dhe Filipineve, sipas një njoftimi për shtyp të Marinës së ShBA-së.
Stërvitjet në brigjet e Filipineve do të përfshijnë stërvitje mbi luftën kundër nëndetëseve, sipërfaqësore dhe ajrore, si dhe fazat tokësore, thuhet në njoftim.
Stabiliteti në rajon shihet se po kërcënohet gjithnjë e më shumë nga konfrontimet midis rojeve bregdetare kineze dhe njësive të milicisë detare, dhe anijeve filipinase rreth pjesëve të diskutueshme në Detin e Kinës Jugore.
Në një intervistë ekskluzive me CNN javën e kaluar, Sekretari i Mbrojtjes i Filipineve, Gilberto Teodoro Jr. e barazoi sjelljen kineze në rajon me atë të një bullizuesi në oborrin e shkollës, raporton CNN.
Ndërsa Pekini thotë se është Manila ajo që po nxit tensionet.
Kina thotë se anijet filipinase po ndërhyjnë në territorin e saj në zinxhirin e ishullit Spratly, pavarësisht një vendimi të gjykatës ndërkombëtare të vitit 2016 që refuzonte pretendimin e Pekinit.
