Deputeti i Partisë Demokratike të Kosovës, Ferat Shala, ka thënë që kjo parti është kundër rritjes së çmimeve të energjisë elektrike sipas propozimit të ZRRE-së.
Shala ka rënditur arsyet se përse Partia Demokratike e Kosovës është kundër shtrejtimit të energjisë elektrike.
“Jemi kundër ngritjes së çmimit të energjisë. Kjo për arsye se as metodologjia, as koha , as praktika e as momenti nuk është që sot të ngritet çmimi i energjisë. Aq më hiç kur kemi një kalkulim dhe një projekt që na sillet përmes dorës zë ZRRE-së i cili është kryekëput projekt qeveritar”, ka thënë Shala në T7.
Tutje, Shala ka thënë se shtrejtimi i energjisë elektrike është bërë në koordinim me Qeverinë pavarësisht se kjo e fundit po mundohet ta mbulojë këtë.
“ZRRE do të duhej të ishte dhe baza ligjore dhe kushtetuese i garanton që të jetë i pavarur. Fatkeqësisht një gjë e tillë po vërtetohet çdo ditë e më shumë që aty kemi ndërhyrje direkte politike. Vet raporti që ne sot e kundërshtuam është raport i hartuar bashkërisht, Qeveri dhe ZRRE. Përkundër se u tentua që të mbulohet kjo, sot u shpërfaq e tëra që raporti u hartua në konsultë të plotë me Qeverinë”, ka thënë ai.
Shala ka thënë se përfundimisht vendos mazhoranca përmes mekanizmave dhe Bordit që i kanë instaluar në ZRRE.
“Përfundimisht fatkeqësisht vendos mazhoranca përmes mekanizmave dhe Bordit që tani kanë instaluar në ZRRE”, tha ai.
