Në Serbi, me rastin e 1-vjetorit të agresionit serb në Banjskë të Zveçanit, është shfaqur një pankartë me sloganin: “Të kujtojmë! Lavdi heronjve”.
Ky akt ka ngjallur reagime të shumta, përfshirë kritikat e avokatit serb, Çedomir Stojkoviq.
Stojkoviq ka akuzuar autoritetet serbe për nxitje të urrejtjes dhe festimin e veprimeve terroriste, duke e cilësuar këtë si një përpjekje për të glorifikuar sulmin terrorist.
“Në përvjetorin e sulmit terrorist në Kosovë/Banjskë të organizuar nga Aleksandar Vuçiq, në Serbi ai sulm festohet si akt heroik, organizuar nga partia në pushtet: ‘Të kujtojmë! Lavdi heronjve nga Banjska’. Qëllimi është i njëjtë me atë kur udhëheqja palestineze feston terrorizmin e Hamasit: të ruajë urrejtjen për konfliktet e ardhshme,” ka shkruar Stojkoviq në postimin e tij në rrjetin social X.
Pankarta që përkujton sulmin e 24 shtatorit 2023, ku u vra rreshteri policor Afrim Bunjaku, është bërë simbol i kësaj glorifikimi.
Milan Radoiçiq, i cili ka marrë përgjegjësinë për sulmin, ende nuk është kapur nga autoritetet, pavarësisht se kërkohet nga Interpol.
Ndërkaq, dy javë më parë Prokuroria Speciale e Republikës së Kosovës ka ngritur aktakuzë kundër Milan Radoiçiqit dhe 44 personave.
Të akuzuarit janë ngarkuar se përmes përdorimit të dhunës dhe armatimit të rëndë tentuan të shkëpusin pjesën veriore të Kosovës dhe ta bashkojnë me Republikën e Serbisë.
