Në një deklaratë të përbashkët, senatorja amerikane Jeanne Shaheen, kryetare e Nënkomitetit të Senatit për Marrëdhëniet me Jashtë për Evropën dhe Bashkëpunimin Rajonal të Sigurisë, Chris Murphy, Chris Van Hollen, Ben Cardin, Thom Tillis dhe Pete Ricketts, thanë se tensionet e fundit në veri po rrezikojnë pa nevojë dobësimin e marrëdhënieve të dy vendeve me ShBA-në.
“Dështimi për të de-përshkallëzuar situatën do të shkaktonte pasoja nga Perëndimi, i cili ka punuar me zell për të mbështetur Kosovën dhe Serbinë në një rrugë përpara, dhe pa nevojë rrezikon të dobësojë marrëdhëniet tona dypalëshe. Kjo nuk është në interesin më të mirë të askujt. Ne i bëjmë thirrje Kosovës dhe Serbisë që të punojnë në mirëbesim me Bashkimin Evropian dhe Shtetet e Bashkuara për të gjetur një rrugë përpara pa vonesë”, thuhet në deklaratën e përbashkët të gjashtë senatorëve amerikanë, raporton Klankosova.tv.
Në deklaratë, ligjvënësit amerikanë thonë se, “përtej linjave partiake, ne jemi gjithnjë e më të shqetësuar nga situata e brishtë e sigurisë në veri të Kosovës”.
“Sot, ne përsërisim se ka mbështetje të gjerë dypartiake në Senatin e SHBA për përpjekjet e Bashkimit Evropian, në koordinim të ngushtë me Shtetet e Bashkuara, për të ndërmjetësuar një rrugë përpara. Por, që një zgjidhje të jetë e qëndrueshme, si kryeministri Kurti ashtu edhe presidenti Vuçiq duhet t’i dëgjojnë menjëherë thirrjet ndërkombëtare për të de-përshkallëzuar situatën, të rikthejnë besimin popullor në institucionet lokale në veri dhe të riangazhohen për zbatimin e Marrëveshjes për Rrugën e Normalizimit duke krijuar një Asociacion të komunave me shumicë serbe në Kosovë”.
“Ndërsa të dy udhëheqësit konsiderojnë hapat e tyre të ardhshëm, ne i nxisim ata të zgjedhin paqen, prosperitetin dhe sigurinë e qytetarëve të tyre përkatës”, u tha në këtë deklaratë.
Kjo deklaratë vjen pas një bisede telefonike mes kryeministrit Kurti dhe senatorëve Shaheen, Murphy dhe Ricketts. Muajin e kaluar, senatorët Shaheen dhe Ricketts lëshuan një deklaratë duke bërë thirrje për qetësi. Në mars, senatorët lëshuan një deklaratë të përbashkët për marrëveshjen e përkohshme të arritur ndërmjet Serbisë dhe Kosovës. Shaheen vizitoi Kosovën dhe Serbinë prillin e kaluar si pjesë e një vizite të delegacionit të Kongresit në Ballkan, e cila përfshinte edhe një ndalesë në Bosnje dhe Hercegovinë.
Me kërkesën e Shaheen, Komiteti i Marrëdhënieve me Jashtë të Senatit mbajti një seancë dëgjimore për Ballkanin Perëndimor muajin e kaluar, e cila erdhi pas shtytjes së ripërtërirë dypartiake të Shaheen për të avancuar legjislacionin e saj që do të nxiste bashkëpunimin midis SHBA-së dhe Ballkanit Perëndimor.
