Policia e qarkut Mettmann ka njoftuar gjatë ditës së mërkurë se ka sekuestruar një transportues makinash me defekte të rënda, gjegjësisht 56 sosh, disa prej të cilave serioze.
Rreth orës 11:30 të paradites së sotme, siç raporton Rheinische Post, zyrtarët e trafikut vunë re kombinimin e automjeteve në autostradën A3. Të njëjtit e drejtuan shoferin 26-vjeçar nga Kosova në një zonë pushimi për inspektim.
26-vjeçari raportohet se deklaroi se po përdorte transportuesin, i cili kishte mbi 400,000 kilometra në kilometrazh, për të blerë makina në Evropë. Një ekspert identifikoi mangësi serioze sa i përket sigurisë: frenat e rimorkios nuk funksiononin, dritat e pasme ishin të dëmtuara dhe shufra e tërheqjes ishte në rrezik të binte. Për më tepër, mungonin po ashtu të gjithë amortizatorët.
Vetë furgoni kishte gjithashtu dëme të konsiderueshme, duke përfshirë pjesë mbajtëse të ngarkesës të ndryshkura, një sistem shkarkimi dhe tub karburanti që rridhnin, si dhe frena dhe drita të prishura. Rripi i sigurimit ishte i papërdorshëm.
Transportuesi i automjeteve u konsiderua plotësisht i pasigurt për përdorim rrugor dhe u sekuestrua. Shoferi duhet të paguajë një gjobë prej 700 eurosh dhe të mbulojë shpenzimet e raportit të ekspertit, të cilat arritën në afërsisht 600 euro.
