Sekretari amerikan i Shtetit Marco Rubio do të jetë në Jeddah, Arabinë Saudite, nga e hëna deri të mërkurën këtë javë për t’u takuar me homologët e tij ukrainas, njoftoi të dielën Departamenti i Shtetit, raporton CNN.
Gjatë udhëtimit, Rubio do të takohet me zyrtarë ukrainas “për të çuar përpara qëllimin e Presidentit për t’i dhënë fund luftës Rusi-Ukrainë”, sipas zëdhënëses së Departamentit të Shtetit, Tammy Bruce.
Takimi në Arabinë Saudite vjen ndërsa të dy vendet punojnë për t’i rivendosur marrëdhëniet e tyre në baza solide pas shpërthimit të muajit të kaluar në Zyrën Ovale midis Presidentit të SHBA Donald Trump, Zëvendës Presidentit JD Vance dhe Presidentit ukrainas Volodymyr Zelensky.
I dërguari special i Trump për Lindjen e Mesme Steve Witkoff u tha më parë gazetarëve se zyrtarët amerikanë dhe ukrainas planifikojnë të takohen këtë javë në Arabinë Saudite.
“Epo, presidenti Zelensky i dërgoi një letër presidentit. Unë mendoj se presidenti mendoi se ishte një hap i parë me të vërtetë i mirë, pozitiv… Dhe unë mendoj se ideja është që të arrihet një kornizë për një marrëveshje paqeje dhe një armëpushim fillestar”, tha Witkoff.
Takimet e tjera të Rubios: Bruce njoftoi gjithashtu se Rubio do të takohet me princin saudit të kurorës Mohammed bin Salman “për të diskutuar mënyrat për të avancuar interesat e përbashkëta në rajon dhe për t’i forcuar marrëdhëniet SHBA-Saudi”. Mbretëria ka qenë mikpritëse e bisedimeve kyçe të SHBA-së si për konfliktin e Ukrainës ashtu edhe për luftën në Lindjen e Mesme.
Rubio më pas do të udhëtojë në Charlevoix, Kanada, për t’u takuar me homologët e tij të G7 në takimin e Ministrave të Jashtëm të G7. Bruce tha se diskutimet do të “përqendrohen në konfliktet në Lindjen e Mesme dhe Europë, bashkëpunimin në Afrikë dhe Indo-Paqësorin dhe stabilitetin në hemisferën perëndimore”.
