Politologu Albinot Maloku ka vlerësuar se Sekretari i Britanisë së Madhe, David Lammy në konferencën e përbashkët me presidenten e Kosovës nuk i dha shumë rëndësi propozimit të Osmanit për një marrëveshje strategjike të përbashkët në fushën e mbrojtjes.
Maloku tha se theksi i deklarimit të tij, ishte te dialogu Kosovë – Serbi të lehtësuar nga Bashkimi Evropian.
“Pavarësisht insistimit të presidentes Osmani për një marrëveshje strategjike në fushën e mbrojtjes, Sekretari i Jashtëm nuk është se i dha shumë rëndësi kësaj, por i dha rëndësi, asaj që e pret Kosovën – dialogut. Kjo ishte fjala kyçe e interesit e diplomatit. Edhe në konferencën e përbashkët nuk përputheshin shumë për ato tema ku në kushte tjera do të duhej të ishin të përafruara. Presidentja fliste për diçka krejt tjetër, kurse diplomati britanik fliste për diçka që është e interesit thelbësor dhe një zë i interesit të faktorit ndërkombëtar që ndërlidhet me nevojat e qytetarëve”, vlerësoi Maloku.
Ai në emisionin “Këndi i Debatit” në Tëvë1 ka thënë se deklarimet e sekretarit britanik janë mesazh edhe për ata që do të formojnë qeverinë e re.
Kryediplomati britanik, David Lammy, bëri të ditur se Britania do të vazhdojë ta mbështes Kosovën, deri sa kërkoi më shumë angazhim për normalizim e marrëdhënieve me shtetin fqinj Serbinë.
“Janë disa gjëra që duam t’i shohim. Normalizim të qëndrueshëm mes Kosovës dhe Serbisë. Britania padyshim është kontribuuese e madhe në KFOR. E kam vizituar KFOR-in herën e fundit që isha këtu dhe do ta vizitojë prapë. Shpresoj që qeveria e ardhshme i adreson nevojat e gjithë qytetarëve, përfshirë progresin në integrimin e serbëve në Kosovë dhe angazhimin e fuqishëm në dialogun e udhëhequr nga BE-ja”, u shpreh sekretari britanik.
Osmani u shpreh falënderuese për mbështetjen e vazhdueshme të Britanisë ndërsa propozoi edhe marrëveshje për mbrojtje dhe ekonomi mes të dyja vendeve.
“Lidhja e marrëveshjes për bashkëpunim strategjik mes dy vendeve që në veçanti do të mbulojë fushën e mbrojtjes dhe të ekonomisë. Pra, sot kemi diskutuar për thellim të bashkëpunimit strategjik në këto fusha që do të vazhdojnë më pas me ekipet tona. Jemi të përkushtuar të konkretizojmë këtë marrëveshje. Ka hapësirë për fuqizim të mëtejshëm të aleancës dhe të prezencës së Mbretërisë së Bashkuar në Kosovë” , tha Osmani.
