Profesori zviceran, Oliver Jens Schmitt, në një intervistë të fundit për mediumin zviceran “Swissinfo.ch”, ka komentuar ngjarjet e fundit në veri të Kosovës.
Ai thotë se ata që kanë interes për t’ia ndaluar qasjen Policisë së Kosovës në veri të vendit janë ata që qëndrojnë pas krimit të organizuar, prandaj thotë se çdo veprim i policisë kosovare tentohet të paraqitet si dhunë etnike.
“Kosova veriore është një qendër e rëndësishme për krimin e organizuar. Në fakt, nuk ka forcë policore në këtë pjesë. Krimi i organizuar ka interes që t’i mohojë qasjen Policisë së Kosovës. Çdo veprim i policisë përshkruhet si dhunë etnike e supozuar. Incidenti i lartpërmendur i tregoi të gjithë botës se sa ngushtë janë të lidhura krimi i organizuar dhe dhuna politike. U bë gjithashtu e qartë se sa ngushtë janë ndërthurur këto grupe të aktorëve politikë kriminalë me qeverinë në Beograd”.
Historiani thotë se të gjitha institucionet në Serbi janë të përkushtuara ta kthejnë Kosovën në Serbi, derisa problematike për këtë e sheh nacionalizmin serb.
“Kjo shkon aq larg sa Kosovës – një shteti të pavarur – i kushtohet një rëndësi e madhe në Kushtetutën e Serbisë dhe të gjitha institucionet serbe janë të përkushtuara për ta rikthyer Kosovën nën kontroll. Nacionalizmi serb dhe miti janë pengesa në rrugën e Serbisë drejt sundimit të ligjit dhe demokracisë. Serbia aktualisht është shumë larg nga kjo”.
Meqë Serbia është ekonomikisht e varur nga Rusia, mediumi zviceran e pyeti Schmitt se a ka ndryshuar këndvështrimi i jashtëm i Kosovës që nga lufta e agresionit rus në Ukrainë.
Ai tha se Serbia e mohon edhe ekzistencën e popullit të Kosovës, përveçse shtetësisë së saj.
“Fillimisht, besohej se Kosova do të përfitonte nga ndryshimi gjeopolitik, sepse marrëdhënia e Ukrainës me Rusinë ka shumë ngjashmëri me marrëdhëniet midis Serbisë dhe Kosovës: Rusia dhe Serbia jo vetëm që mohojnë shtetësinë e njëra-tjetrës, por edhe ekzistencën e tyre si popull. Ju dëshironi të shpërndani personin tjetër, ta integroni në grupin tuaj ose ta largoni. Ka edhe teori serbe se shqiptarët në fakt janë serbë të konvertuar në islam”.
Ai tha se Aleksandar Vuçiq, i cili gjithashtu është i prirur ideologjikisht drejt Rusisë, nuk është një demokrat, por një sundimtar autoritar që vepron brutalisht nga brenda.
“Fakti që Perëndimi po i afrohet është gjithashtu i rrezikshëm sepse Kosova është e vetmja demokraci funksionale në rajon”.
