Kur presidenti rus, Vladimir Putin, njoftoi për vendimin e tij për njohjen e pavarësisë së dy rajoneve lindore të Ukrainës, anëtarja e NATO-s dhe fqinja e Rusisë në Detin e Zi, Turqia, e kritikoi shpejt këtë veprim, por nuk njoftoi për ndonjë masë ndëshkuese.
Turqia ndodhet në një pozitë posaçërisht të vështirë: ajo ka lidhje të mira edhe me Ukrainën, edhe me Rusinë, por gjithashtu i kundërshton sanksionet në parim, ndonëse Perëndimi ka filluar që t’i vendosë ato kundër Moskës, siç ka premtuar për një kohë të gjatë.
Kjo krizë e lë Presidentin Rexhep Erdogan duke i baraspeshuar marrëdhëniet diplomatike bashkë me detyrat e tij brenda NATO-s derisa gjithashtu vihet në mbrojtje të ekonomisë turke, të rrethuar nga problemet, nga goditjet e vazhdueshme pas krizës së valutës në dhjetor.
Çfarëdo hapi shumë i largët kundër Moskës do të bënte që Ankaraja t’i rrezikonte furnizimet e rëndësishme energjetike, tregtinë dhe turizmin nga Rusia, thonë analistët.
“Është perspektiva e një konflikti të zgjatur pa gjak ose e sanksioneve thelbësore ndaj eksporteve ruse të energjisë, që do të mund ta godisnin thellësisht Turqinë (dhe ta rrezikonin) stabilitetin ekonomik”, tha Atilla Yesilada, analist në “GlobalSource Partners”, shkruan Reuters, përcjell Gazeta Express.
Duke e goditur baraspeshën që Turqia e ka zbatuar me dekada, Erdogani shpesh e vë në dukje miqësinë e tij me Putinin, por e ka paralajmëruar Rusinë kundër pushtimit dhe ka bërë ofertë për të ndërmjetësuar në krizë. Ai gjithashtu e ka kritikuar menaxhimin e çështjeve nga Perëndimi, duke e cilësuar pengesë për paqe.
“Sanksionet kundër Rusisë janë të padobishme. Vetëm i shtyni problemet”, tha zëdhënësi i presidencës turke, Ibrahim Kalin, gjatë fundjavës për gazetën gjermane “Die Welt”, duke shtuar se nevojiten “rregulla dhe parime të reja” që Rusia dhe Perëndimi të ndihen të sigurt. “Rusia ndihet e kërcënuar nga NATO-ja”, shtoi ai.
Ndonëse ka bashkëpunuar me Rusinë në energji dhe tregti, Turqia gjithashtu i ka shitur dronë të sofistikuar Ukrainës dhe ka nënshkruar një marrëveshje për të prodhuar së bashku më shumë pajisje të tilla, duke e zemëruar Moskën.
