Më 18 dhjetor të mërkurën një ditë para mbledhjes së Këshillit Evropian, në Bruksel do të mbahet Samiti në mes të Bashkimit Evropian dhe Ballkanit Perëndimor.
Në këtë samit, sipas një njoftimi zyrtar, pritet të diskutohet për Planin e Rritjes së Bashkimit Evropian si dhe përpjekjet drejt integrimeve rajonale.
Samiti pritet të nisë me fillim nga ora 17:30, ku ndër të tjera do të diskutohen edhe mundësit e avancimit të integrimit gradual në mes të Bashkimit Evropian dhe rajonit.
“Ndërsa darka e punës do të fokusohet në sfidat e përbashkëta gjeopolitike. Besoj se konteksti aktual gjeopolitik kërkon që t’i jepet një vrull i ri punës së BE-së me vendet e rajonit”, thuhet në njoftim.
Ndryshe zbatimi i Marrëveshjes Bazike (Bruksel më 27 shkurt, Ohër më 18 mars 2023), është çelësi i anëtarësimit të Kosovës dhe Serbisë në Bashkimin Evropian, tha Përfaqësuesja e re Bashkimit Evropian për Politikë të Jashtme dhe Siguri, Kaja Kallas, duke rikonfirmuar se do të vazhdojë linjën e njëjtë të paraardhësit të saj, Josep Borrell, sa i përket dialogut Prishtinë-Beograd.
Ardhja e ish-kryeministres estoneze në krye të diplomacisë evropiane ka shtuar optimizmin tek liderët e Kosovës, për shkak se presin një qasje më të balancuar të politikës së BE-së në raport me Prishtinën, posaçërisht sa i përket dialogut me Serbinë, pasi që parapraken, atë të Borrell-it, e kanë konsideruar si të pabalancuar.
Por, në takimet e para që Kallas pati me Kryeministrin e Kosovës, Albin Kurti, dhe Presidentin e Serbisë, Aleksandër Vuçiç, në Bruksel, dy ditë pasi që mori mandatin e kryediplomates evropiane, kërkoi atë që ka kohë që Unioni e kërkon: zbatimin e Marrëveshjes Bazike.
“Anëtarësimi në BE mund të arrihet vetëm përmes normalizimit të marrëdhënieve mes tyre, duke u bazuar në Marrëveshjen e Ohrit”, tha Kallas të martën, përmes një postimi në platformën X.
