Megjithëse Deborah Latouche punonte si stiliste dhe shkrimtare e modës për botimin në italisht të revistës Elle, ajo e kishte ende të vështirë të gjente veshje ceremoniale që plotësonin kërkesat e saj, veçanërisht si grua myslimane.
“Tashmë ishte e vështirë të gjeja një fustan të përshtatshëm për një grua të gjatë dhe të masës plus, por nëse e gjeja, shikoja që pjesa e kurrizit ishte plotësisht e hapur. Gjithmonë kishte diçka të hapur, që më duhej ta mbuloja me një shtresë tjetër”, thotë ajo.
E demoralizuar nga kompromiset e vazhdueshme dhe mungesa e markave kulturore gjithëpërfshirëse të përshtatshme për adhuruesit e modës si ajo, në vitin 2020, Latouche, e cila jeton në Londër, hodhi në treg markën e saj luksoze të veshjeve modeste Sabirah.
Koleksioni i personalizuar (“Sabirah” që në arabisht do të thotë “durim”) përmban fustane të gjata me ngjyrë pastel, kaftanë krep, xhaketa të mrekullueshme mëndafshi me bel të hollë me pantallona të përshtatura e shumë më tepër se kaq. Marka ka marrë vlerësime nga kritikë me ndikim në modë si Sarah Mower, ndërsa ka tërhequr ndjekës të fortë, përfshirë modelen myslimane Ikram Abdi Omar dhe klientë jofetarë si Ciinderella Balthazar dhe MNEK.
Marka udhëhiqet nga një etikë e modës së ngadaltë dhe qëndrueshmërisë; materialet e përdorura janë të gjitha mbetje të pëlhurave të modës së lartë dhe kopsa të vjetra nga Italia dhe Parisi. Për këtë arsye nuk do ta shihni kurrë Latouche duke i nxitur klientët e saj të blejnë rroba të reja pa arsye. Koleksioni i saj i kufizuar paraqitet si diçka që shkon me një veshje që tashmë e zotëroni.
“Ne mendojmë se si gratë e përdorin gardërobën e tyre. Vetëm se ke blerë diçka dy vjet më parë, nuk do të thotë se duhet ta heqësh nga gardëroba jote aktuale”, shton ajo.
Në vitin 2023, Latouche planifikon të zgjerojë markën e saj në Lindjen e Mesme për një arsye të thjeshtë: “Unë besoj në madhështinë e të gjitha grave, pavarësisht nga përmasa, etnia ose feja”. Dhe Sabirah është dëshmi për këtë.
Yelena Grelet është gazetare multimediale dhe regjisore filmash që jeton në Londër. /Service95/
