Ndonëse ndërrimi i të brendshmeve është jashtëzakonisht i rëndësishëm për higjienën dhe shëndetin tonë, sa shpesh i ndërrojmë ato varet nga disa faktorë të rëndësishëm, në radhë të parë nga niveli i aktivitetit tonë të përditshëm fizik.

“Në situatat kur aktiviteti ynë i përditshëm është minimal dhe nuk jemi djersitur, është e pranueshme që të ndërrojmë të brendshme çdo ditë tjetër”, tha për Daily Mail,Anju Methil, dermatologe nga kompania indiane ClinicSpots. Ajo shtoi se të brendshmet e meshkujve që janë pak më të lirshme, të tilla si boksierët e gjerë, gjithashtu lejojnë një kohë pak më të gjatë të veshjes, transmeton Klankosova.tv.

Një studim i qershorit të Newsweek me 1500 të rritur zbuloi se 47% e tyre nuk veshin kurrë të brendshme për më shumë se një ditë. Megjithatë, deri në 37% e anëtarëve të Gjeneratës Z pranuan se ndonjëherë veshin të brendshme për më shumë se 24 orë, që është periudha më e gjatë në mesin e të gjitha grupmoshave të anketuara.

“Nëse veshin të brendshme të pista për një kohë të gjatë, burrat dhe gratë rrezikojnë acarimin e lëkurës, skuqjen, infeksionet kërpudhore ose përkeqësimin e kushteve ekzistuese si psoriasis ose ekzema”, paralajmëron për Daily Mail, Sarah Roberts, eksperte e kujdesit të lëkurës dhe themeluesja e A Beauty Edit.

Nga ana tjetër, gratë që kanë perioda të rënda dhe sekrecione të rënda vaginale duhet të konsiderojnë ndërrimin e të brendshmeve disa herë në ditë për të parandaluar zhvillimin e infeksioneve, përcjell Index.hr.

Sa shpesh i ndërroni të brendshmet mund të varet edhe nga klima në të cilën jetoni. Në klimat shumë të nxehta dhe të lagështa, këshillohet ndërrimi i të brendshmeve disa herë në ditë, ndërsa në rajonet më të ftohta kjo nuk do të jetë e nevojshme.