James Rubin, ish-ndihmës i Sekretares amerikane të Shtetit, po vijon dëshminë e tij në Gjykatën Speciale, në procesin ndaj Hashim Thaçit dhe ish-krerëve të Ushtrisë Çlirimtare të Kosovës, të akuzuar për krime lufte dhe krime kundër njerëzimit.
Gjatë seancës së sotme, atij iu prezantuan deklarata të pjesëmarrësve në Konferencën e Rambujesë të vitit 1999, përfshirë edhe fjalët e Sekretares së atëhershme të Shtetit, Madeleine Albright.
Një nga gjykatësit citoi Albright, e cila i ishte referuar Hashim Thaçit si “lider”, dhe e pyeti Rubin lidhur me këtë vlerësim dhe me strukturën komanduese të UÇK-së.
“Ajo tha ‘lider, padyshim lider’… Nuk i drejtohet Adem Demaçit, as nuk thotë se ishte një lloj ministri i jashtëm”, tha gjykatësi.
“Ajo tha ‘njëri prej liderëve’, dhe këtu ka një dallim të madh,” u përgjigj ai.
Megjithatë, Rubin theksoi se qëndrimi i ShBA-së ishte i qartë:
“Ne donim që Thaçi të kthehej në një udhëheqës, udhëheqës i një kombi.”
Ai shtoi se ka pasur autoritet të plotë nga Albright dhe se, po të kishte ndonjë informacion tjetër për rolin e Thaçit, ai do ta kishte ditur.
