Një incident i pakëndshëm ka ndodhur gjatë koncertit të fundit të superyllit Beyoncé në stadiumin Tottenham Hotspur në Londër, ku fansat e saj u përfshinë në një përplasje fizike që ka tërhequr vëmendjen e mediave ndërkombëtare.
Ngjarja ndodhi teksa këngëtarja 43-vjeçare po performonte këngën “Why Don’t You Love Me”, pjesë e turneut të saj më të ri, “Cowboy Carter”. Gjatë performancës, dy persona që ndodheshin shumë afër skenës u përfshinë në një përleshje të papritur.
Një burrë i veshur me një kostum të zi kauboji – dukshëm frymëzuar nga stili i turneut – sulmoi një person tjetër në turmë, duke krijuar panik dhe konfuzion mes të pranishmëve.
Disa nga fansat u përpoqën të ndërhynin për të qetësuar situatën, ndërsa nuk është ende e qartë nëse stafi i sigurisë ndërhyri menjëherë për të ndalur përplasjen. Incidenti ndodhi shumë pranë skenës, çka e bën edhe më të ndjeshme përjetimin e atyre që ishin afër vendit të ngjarjes.
Pavarësisht incidentit, koncerti vazhdoi, dhe Beyoncé nuk reagoi publikisht për atë që ndodhi. Sidoqoftë, pamjet e momentit kanë qarkulluar me shpejtësi në rrjetet sociale, duke nxitur debat për menaxhimin e sigurisë në ngjarje të tilla me pjesëmarrje masive.
Turneu “Cowboy Carter” ka qenë një nga më të përfolurit të këtij viti, si për stilin unik të Beyoncé-s, ashtu edhe për atmosferën spektakolare që ka krijuar në çdo qytet – por incidenti në Londër ka hedhur pak hije mbi një natë që ishte menduar të ishte e paharrueshme vetëm për muzikën. /Telegrafi/
