Drejtori i RTK, Rilind Gërvalla i cili ka larguar pesë moderatorë nga ekrani, tani ka urdhëruar që njëjtit të mos i lejojë të futen në studiot për prezantim.
Periskopi ka siguruar letrën ku janë shkruar emrat e këtyre gazetarëve që është vendosur në hyrje të RTK’së, tek sigurimi, ku poshtë emrave shkruhet “të larguara nga moderimi në RTK: Fëllanza Çitakun, Fitore Rexhepin, Alba Merovcin, Jehona Zhitinë dhe Arbër Zekën.
Ky penalizim që iu është bërë moderatorëve të disa emisioneve vjen pas një paralajmrimi që Gërvalla u kishte bërë stafit të RTK-së në fillim të muajit mars se nuk kanë të drejtë më të bëjnë reklama në rrjetet e tyre sociale, sepse duhet të ruhet profesionalizmi i televizionit publik.
“Duke marrë parasysh misionin e transmetuesit publik për të ruajtur profesionalizmin dhe besueshmërinë e programeve tona, ju njoftojmë se është marrë vendim për tu ndaluar reklamimi i produkteve, shërbimeve, ose brendeve në rrjetet tuaja sociale. Ky vendim është marrë në përputhje me politikën tonë të ruajtjes së integritetit dhe besueshmërisë të transmetuesit publik, si dhe për të shmanguar çdo ndërlidhje të mundshme mes interesave të jashtme dhe misionit tonë publik”, thuhet në këtë Email të RTK-së.
