Udhëheqësi Suprem i Iranit, Ajatollah Ali Khamenei, i cili e shndërroi vendin në një forcë të fuqishme anti-SHBA dhe e zgjeroi ndikimin e tij ushtarak në të gjithë Lindjen e Mesme, ndërsa shtypte trazira të përsëritura të brendshme, u vra në sulme izraelite dhe amerikane, i tha Reuters-it të shtunën një zyrtar i lartë izraelit.
Nga ana e shtetit iranian, sipas Reuters, nuk ka ende asnjë konfirmim për fatin e tij.
Shtetet e Bashkuara dhe Izraeli kryen sulme ushtarake ndaj Iranit të shtunën, duke vënë në shënjestër udhëheqësit e tij të lartë dhe duke e zhytur Lindjen e Mesme në një konflikt që Presidenti Donald Trump tha se do t’i jepte fund një kërcënimi sigurie për ShBA-në dhe do t’u jepte iranianëve një shans për të rrëzuar sundimtarët e tyre.
Khamenei, 86 vjeç, u bë autoriteti më i lartë i Iranit në vitin 1989, pas vdekjes së themeluesit të Republikës Islamike, Ajatollah Ruhollah Khomeini. Si udhëheqës suprem, ai mbajti kontrollin përfundimtar mbi institucionet politike, ushtarake dhe fetare të Iranit, duke formësuar politikën e brendshme dhe duke drejtuar marrëdhëniet e jashtme.
Izraeli prej kohësh e shihte atë si një forcë destabilizuese në Lindjen e Mesme, duke përmendur mbështetjen e tij për rrjetin e aleatëve militantë të Iranit, duke përfshirë Hamasin palestinez dhe Hezbollahun e Libanit. Kur Izraeli dhe Irani luftuan në një luftë ajrore 12-ditore në qershor 2025, Ministri i Mbrojtjes i Izraelit, Israel Katz, kërcënoi se do ta vriste atë, duke thënë se udhëheqësi suprem “nuk mund të vazhdojë të ekzistojë”.
