Fushata e korrje-shirjeve të grurit përfundoi. Bujqit mbetën të zhgënjyer nga rendimentet që morën sivjet. Pritjet i kishin më të mëdha, por reshjet e vazhdueshme deri në gjysmë të qershorit, bënë që të bjerë rendimenti i grurit. Nga Shoqata e Mullisëve po shikojnë mundësitë e importit.
Për bujkun Mehdi Bresilla, rendimenti i grurit sivjet ishte i ulët. “I kam nxjerrë diku 3 mijë kg prej 1 hektari, por që aspak nuk jam i kënaqur sepse me 3 mijë kg as shpenzimet elementare nuk kemi mundur t’i nxjerrim, pa llogaritur punën tonë dhe shpenzimet themelore. Mirëpo, deri diku subvencionet e kompensojnë këtë sepse me një rendiment prej 3 mijë kg me subvencione do të shkojmë deri në 450 euro”, ka theksuar Bresilla.
Për dallim nga ai, fermeri Valon Vehapi shprehet i kënaqur nga rendimenti i grurit. “Pritshmëritë i kemi pasur më të mëdha, në bazë qysh ka qenë bima e shëndoshë në pranverë mirëpo kushtet klimatike e bën të veten dhe tani kemi rendiment prej 5 tonë e gjysmë për hektarë”, ka thënë Vehapi.
Profesori universitar i bujqësisë, Imer Rusinovci, tha se mesatarja e prodhimtarisë në nivel vendi pritet të jetë e ulët. “Patëm reshje të vazhdueshme të shiut në mars, prill dhe maj dhe 11 ditë të qershorit radhazi që ndikoi në shtyrje të të mbjellurave dhe e zgjati shumë afatin e korrje-shirjeve të grurit. Kjo përveç në sasi ndikoi edhe në cilësi”, ka theksuar Rusinovci.
Edhe pritjet e Shoqatës së Mullisëve ishin më të mëdha. Bashkim Zejnullahu, nga Shoqata e Mullisëve ka theksuar se korrje-shirjet nuk kanë qenë aq të kënaqshme si në rendiment ashtu edhe në kualitet. “Kjo më së tepërmi ka ndikuar te fermerët tanë, të cilët kanë pritur më shumë por shkaku i reshjeve dhe kushteve atmosferike kemi pasur rendiment më të ulët dhe kualitet më të dobët”, ka thënë Zejnullahu.
Sivjet korrja e grurit është bërë më vonë se zakonisht, për shkak të reshjeve të vazhdueshme atmosferike. Kosova pati të mbjella me grurë mbi 60 mijë hektarë.
