Real Madrid po konsideron mundësinë e nënshkrimit të Erling Haaland si një alternativë në rast se Vinicius Jr. largohet nga klubi gjatë verës, raporton Sport.
Vinicius ka kërcënuar dy herë se mund të largohet nga Madridi, ndërsa kontrata e tij skadon brenda pak më shumë se 18 muajsh.
Sulmuesi brazilian më pas ka kërkuar falje për deklaratat e tij, por situata mund të mbetet e paqartë nëse trajneri Xabi Alonso vazhdon të marrë vendime të ngjashme si në El Clasico – duke e zëvendësuar para kohe ose duke mos e aktivizuar fare.
Sa i përket Haaland, ai ka një kontratë 10-vjeçare me Manchester Cityn, por përfshin një klauzolë largimi që mund të lejojë një klub si Real Madrid ta transferojë lehtësisht në rast se norvegjezi dorëzon një kërkesë për kalim.
Nëse Real Madrid realizon transferimin, Haaland do të mbajë rolin e numrit 9 në ekip, ndërsa Kylian Mbappe do të kthehet në pozitën e tij të preferuar në krahun e majtë të sulmit.
Nuk është hera e parë që Haaland lidhet me kalimin te Real Madridi.
