Sindikata e Policisë ka dënuar vrasjen e rreshterit Muhamed Lika në Kaçanik, duke e cilësuar atë si atentat dhe sulm të drejtpërdrejtë ndaj sigurisë publike dhe vetë shtetit të Kosovës.
“Çdo sulm ndaj një zyrtari policor është sulm ndaj Republikës së Kosovës! Policia e Kosovës është shtylla kryesore e rendit dhe sigurisë në vend. Prekja e saj është përpjekje për të minuar themelet e shtetit tonë dhe nuk do të tolerohet”, thuhet në reagimin e Sindikatës.
Ajo ka bërë thirrje për veprime të menjëhershme nga institucionet e drejtësisë për të hetuar dhe ndëshkuar autorët e këtij akti kriminal.
“Sindikata e Policisë së Kosovës qëndron e palëkundur në mbështetje të çdo pjesëtari të saj dhe nuk do të lejojmë që aktet e tilla të frikësimit të lëkundin përkushtimin tonë ndaj detyrës dhe Republikës”, theksohet në reagim.
Në fund, Sindikata i ka shprehur nderimet dhe respektin për sakrificën e rreshterit Muhamed Lika, duke theksuar se drejtësia për të duhet të vihet në vend sa më shpejt.
Muhamed Lika u vra të martën në mbrëmje para hyrjes së banesës së tij.
