Ish-komandanti i Stacionit Policor në Suharekë, kapiten Afrim Sylaj, ka reaguar pas transferimit në Qendrën Rajonale të Komunikimit në Prizren.
Ai për “Klan Kosova” ka thënë se ky ndryshim nuk është shkarkim, por transfer për arsye operative.
“Nuk është shkarkim. Jam transferuar si shef i Qendrës Rajonale të Komunikimit në Prizren. Vetëm për nevoja operative. Asnjëherë nuk kam pasur masë disiplinore apo vërejtje,” – tha Sylaj.
Ndërkohë, pas zhvillimeve të fundit në vend, Policia e Kosovës ka konfirmuar se komandanti i stacionit policor në Lipjan, kapiten Argjent Gashi, ka kërkuar të lirohet nga kjo detyrë dhe kërkesa e tij është miratuar.
Në vend të Gashit, është emëruar kapiten Brahim Shatrolli. Ndërkohë, kapiten Faik Jahmurataj është caktuar komandant i stacionit policor në Pejë, kurse kapiten Enis Lluka do të udhëheqë stacionin policor në Klinë.
