Udhëheqësit botërorë kanë dhënë reagime të ndryshme pasi forcat amerikane kapën të shtunën presidentin e Venezuelës, Nicolás Maduro, së bashku me bashkëshorten e tij.
Kryeministri britanik Keir Starmer tha se do të vazhdojë të bisedojë me homologët amerikanë për një tranzicion drejt demokracisë. “Ne e konsideruam Maduron një president të paligjshëm dhe nuk derdhim lot për fundin e regjimit të tij,” shkroi ai në X.
Presidenti francez Emmanuel Macron tha se Maduro ka “minuar rëndë dinjitetin e popullit të vet”. Macron shtoi se Franca dëshiron që një tranzicion drejt demokracisë të mbikëqyret nga Edmundo González Urrutia, ish-kandidati në zgjedhjet presidenciale të kontestuara të vitit 2024.
Presidentja e Komisionit Evropian, Ursula von der Leyen, tha se po e ndjek situatën “shumë nga afër”. Ajo shtoi se “çdo zgjidhje duhet të respektojë të drejtën ndërkombëtare dhe Kartën e OKB-së”.
Presidenti brazilian Luiz Inácio Lula da Silva e quajti sulmin amerikan ndaj Venezuelës një “cenim serioz” të sovranitetit të vendit. Sulmi kaloi një “vijë të papranueshme,” tha ai.
Presidenti kuban Miguel Díaz-Canel e dënoi ashpër atë që e quajti një sulm “kriminal” nga SHBA ndaj Venezuelës në një postim në X.
Presidentja meksikane Claudia Sheinbaum shpërndau një deklaratë ku thuhej se qeveria e saj “e dënon fuqishëm dhe e refuzon” sulmin.
Presidenti argjentinas Javier Milei, aleat i presidentit amerikan Donald Trump, duket se e mirëpriti kapjen e udhëheqësit të Venezuelës me një mesazh të shkurtër në X: “Liria avancon! Rroftë liria, dreqi ta hajë!”
Zëdhënësi i Ministrisë së Jashtme të Kinës tha se Kina ishte “thellësisht e tronditur dhe e dënon fuqishëm përdorimin e hapur të forcës nga SHBA kundër një shteti sovran.”
