Nenad Rashiq, në një intervistë për Debat Plus në RTV Dukagjini, ka theksuar se distancohet nga qasja politike e Listës Serbe, të cilën e cilëson si përfaqësuese të së kaluarës dhe mendësisë së viteve të ’90-ta.
“Ta bëj një paralele: Lista Serbe prezanton të kaluarën, mendimet e viteve të ’90-ta. Unë këtë e marr si një element ku nuk synojmë ne. Dua të jem një përfaqësues autentik i serbëve të Kosovës”, deklaroi Rashiq.
Ai tha se rrugën e tij politike e ka përcaktuar që para 20 vitesh, duke zgjedhur të besojë në të ardhmen dhe jo në të kaluarën.
“Prej momentit të parë kam vendosur të besoj në të ardhmen dhe në këtë drejtim po ftoj të gjithë”, tha ai.
Rashiq gjithashtu akuzoi Sllavko Simiqin, kandidatin e Listës Serbe dhe ish-nënkryetar të Kuvendit, për mungesë të plotë angazhimi e përfaqësimi të serbëve në institucionet e Kosovës.
“Tetë vitet e fundit, kur Simiqi ka qenë nënkryetar, jo që ka bërë ndonjë fjalë, ndonjë vepër, por asnjë deklaratë kurrë nuk e ka bërë në interes të serbëve të Kosovës. Ky është një reagim moral që nga unë kërkon të kandidoj kundër një fenomeni të tillë që përfaqëson keq”, u shpreh Rashiq.
