Barcelona ka marrë një lajm të shkëlqyer përpara “El Clásico”-s së fundjavës kundër Real Madridit: Raphinha është rikthyer në stërvitje dhe është shumë pranë rikuperimit të plotë. Sulmuesi brazilian është parë këtë të mërkurë në “Ciutat Esportiva” duke punuar me grupin, një muaj pasi pësoi dëmtim në bicepsin femoral të kofshës së djathtë në ndeshjen ndaj Oviedos.
Edhe pse fillimisht parashikohej një mungesë rreth trejavore, klubi vendosi t’i jepte disa ditë shtesë pushimi për ta shmangur çdo rrezik rikthimi të dëmtimit. Sipas raportimeve nga stafi teknik, Raphinha i është përgjigjur pozitivisht planit të rikuperimit dhe pritet të stërvitet normalisht nga e enjtja, me mundësi reale për t’u përfshirë në listën e ndeshjes ndaj Real Madridit.
Tekniku Hansi Flick ka qenë gjithmonë optimist për rikthimin e tij. “Shpresojmë që të jetë gati për ‘El Clásico’. Ka pasur disa pengesa, por po ecën në rrugën e duhur,” kishte deklaruar gjermani pak ditë më parë. Ai gjithashtu e ka vlerësuar rëndësinë e brazilianit në sistemin e tij: “Më mungon Raphinha, sepse sezonin e kaluar ishte thelbësor për ne – si në sulm ashtu edhe në presionin e lartë.”
Roli i tij në krahun e djathtë është parë si një element që i ka munguar Barcelonës në ndeshjet e fundit, ku skuadra ka vuajtur për ritëm dhe presion në fazën ofensive.
Megjithatë, stafi mjekësor do të vlerësojë gjendjen e lojtarit deri në momentet e fundit për të vendosur nëse do të jetë gati të nisë nga minuta e parë apo do të aktivizohet në pjesën e dytë.
Prania e Raphinhës në “Santiago Bernabéu” do të ishte një shtysë e madhe për skuadrën e Flickut, e cila kërkon një fitore të madhe për të marrë kryesimin në La Liga dhe për të dërguar një mesazh të qartë se Barcelona është sërish gati të luftojë për gjithçka.
