Kryetari i Komunës së Prishtinës, Përparim Rama, ka reaguar ashpër përmes një postimi në Facebook ndaj menaxhmentit të ndërmarrjes publike “Pastrimi”, duke akuzuar drejtuesit e saj për keqpërdorim të parasë publike, dështim në menaxhim dhe mungesë të theksuar të transparencës.
Sipas Ramës, Komuna e Prishtinës ka dhënë një mbështetje të jashtëzakonshme për ndërmarrjen, duke përfshirë:
12 milionë euro për të hyra dhe subvencione,
1.4 milionë euro për blerjen e kamionëve të rinj,
3,800 kontejnerë të rinj, të financuar plotësisht nga Komuna.
Megjithatë, pavarësisht kësaj ndihme të konsiderueshme financiare, Rama u shpreh i indinjuar për performancën e ndërmarrjes, të cilën e cilëson si “dështim sistematik”.
“Përkundër kësaj mbështetjeje të konsiderueshme, menaxhmenti i kësaj ndërmarrjeje ka dështuar në mënyrë sistematike në përmbushjen e misionit të vet dhe, për më tepër, ka prodhuar skandale të njëpasnjëshme për keqpërdorimin e parasë publike.”
