Kryeministri Edi Rama ka reaguar përsëri në rrjetin social X për sulmet e Iranit ndaj vendeve të Gjirit Persik, duke lëshuar raketa, dronë dhe shkaktuar dëme e viktima.
Teksa dënon sulmet e regjimit të Ajatollahëve në Iran, kreu i qeverisë vë në dukje sistemin e përparuar teknologjiko-ushtarak të vendeve të Gjirit në parandalimin e raketave, por edhe në sekretin kryesor të tyre, “bashkimin” përballë rrezikut.
Rama nënvizon se Shqipëria shpreh solidaritet të plotë dhe të palëkundur edhe me vende të tjera të Gjirit që u sulmuan, si Bahreini dhe Kuvajti, teksa më herët, po me një postim, deklaroi përkrahjen edhe ndaj Emirateve të Bashkuara Arabe.
“Solidaritet i plotë dhe i palëkundur edhe me Kuvajtin dhe Bahreinin. Në Gjir, siguria është e pandashme. Siguria e njërit është forca e të gjithëve”, thotë kryeministri.
Postimi i Kryeministrit Edi Rama në platformën X:
“Arabia Saudite dhe Katari, dy xhevahire rrezatuese në kurorën vezulluese të një Lindjeje të Mesme të re, të përcaktuar nga shpresa, zhvillimi marramendës dhe bashkëpunimi i guximshëm rajonal, kanë treguar edhe një herë se si duket udhëheqja e përgjegjshme përballë agresionit të papërgjegjshëm.
Raketat u interceptuan, kërcënimi u neutralizua dhe mesazhi ishte i qartë: ata që luajnë bixhoz me kaosin do të përballen me forcë dhe saktësi.
Kur objektet kritike të infrastrukturës dhe zonat civile bëhen objekt sulmi, kjo nuk është kurrë një “incident lokal”. Është një sulm ndaj vetë stabilitetit, ndaj prosperitetit, ndaj vizionit të përbashkët për një Gjir që ka zgjedhur progresin përballë provokimit dhe partneritetin përballë paranojës.
Aftësia e tyre për të rrëzuar raketat pasqyron jo vetëm kapacitete të avancuara mbrojtëse dhe koordinim të shkëlqyer, por edhe qartësi strategjike dhe vendosmëri të palëkundur. Megjithatë, përtej teknologjisë dhe taktikave, fuqia e vërtetë qëndron te uniteti: te vendet e Gjirit që qëndrojnë krah për krah kundër atyre që e ngatërrojnë përçarjen me ndikimin.
Solidaritet i plotë dhe i palëkundur edhe me Kuvajtin dhe Bahreinin. Në Gjir, siguria është e pandashme. Siguria e njërit është forca e të gjithëve”.
