Në emisionin EURO n’T7 sonte është diskutuar për vendosjen e tarifave amerikane prej 10% për prodhimet kosovare.
Deri më sot, duke u bazuar në një listë preferenciale, mbi 3500 produkte nga Kosova janë eksportuar pa taksa në SHBA.
Derisa produktet kosovare janë eksportuar në SHBA pa taksa, të gjitha produktet amerikane të importuara në Kosovë janë doganuar me taksë 10% që nga 5 shtatori i vitit 1999.
Lulzim Rafuna, kryetar i Odës Ekonomike të Kosovës, ka thënë se është në dorën e qeverisë aktuale që të marrë një vendim për suspendimin e taksës prej 10% për produktet amerikane dhe se, nëse kanë vullnet, mund ta bëjnë këtë edhe tash sa janë qeveri në detyrë.
“Deklarata e ministrit Murati dje, se kërkesa nga Presidentja për heqjen e taksës prej 10% ndaj produkteve amerikane ka ardhur pas orës 16:00, është joprofesionale, sepse qeveria, kryetari i kuvendit dhe presidentja janë në shërbim të interesave të vendit 24/7. Qeveria nuk është një sportel apo zyrë administrative që pas orës 16:00 mbyllet. Institucionet duhet të jenë më profesionale dhe të reagojnë shpejt në mbrojtje të interesave tona,” ka thënë Rafuna.
Në anën tjetër, taksa prej 10%, e cila është vendosur që nga koha e UNMIK-ut, fillimisht ishte e aplikuar për të gjitha mallrat që hynin në Kosovë dhe jo vetëm për ato nga SHBA, derisa për shumë vende është ndryshuar në bazë të marrëveshjeve të ndryshme tregtare. Ndërsa për SHBA ka mbetur e njëjta që prej atëherë.
Rafuna shpjegon arsyen pse kjo taksë doganore me SHBA-në nuk ka ndryshuar deri tani.
“Që nga vendosja e kësaj takse prej 10%, ajo nuk është vërejtur, sepse shkëmbimet tregtare kanë qenë shumë të vogla me SHBA-në. Deri në vitin 2016 nuk ka pasur fare eksport për SHBA. Tek atë vit kemi pasur mallra me vlerë rreth 1 milion euro të eksportuara, ndërsa diku rreth 37 milionë euro importe në 2015 dhe 55 milionë euro importe në 2016. Tani, nën administratën Trump, çështja e tarifave është aktualizuar, jo vetëm në raport me Kosovën, por me gjithë botën, duke iu vendosur Kosovës një tarifë doganore prej 10%. Unë jam i bindur se, sikur të kishim një kompani lobuese në SHBA – gjë që, për fat të keq, nuk e kemi – kjo taksë doganore nuk do të na vendosej. Kosova është i vetmi shtet në rajon që nuk ka asnjë kontratë lobuese në SHBA,” ka shtuar Rafuna.
Sipas kreut të Odës Ekonomike të Kosovës, derisa Kosova nuk ka asnjë kontratë lobuese në SHBA as për çështje politike e as për ato ekonomike, shtetet e rajonit kanë deri në pesë kontrata me kompani të ndryshme për lobim në SHBA.
