Prej disa kohësh është spekuluar se Apple do të heqë iPhone Plus nga asortimenti duke filluar nga viti i ardhshëm dhe do ta zëvendësojë atë me një model të njohur aktualisht si iPhone 17 Slim, dhe tani kanë dalë disa detaje rreth specifikave të kësaj pajisjeje.
Siç sugjeron emri i tij, iPhone 17 Slim duhet të jetë “i hollë”, të paktën kur bëhet fjalë për një iPhone dhe njësoj si iPad Pro i fundit i Apple, i cili është tableti më i hollë në historinë e kompanisë.
Tani dihen detaje të reja, të zbuluara nga analisti Ming-Chi Kuo. Ai pretendon se iPhone Plus aktualisht përbën vetëm 5 deri në 10 për qind të shitjeve totale të iPhone dhe për këtë arsye do të hiqet nga linja, transmeton telegrafi.
Nga ana tjetër, ofertën do ta plotësojë edhe iPhone 17 Slim me ekran 6.6 inç me rezolucion 1260×2740 piksele, i cili do të mundësohet nga procesori A19, ndërsa modelet e iPhone 17 Pro do të përdorin procesorin e Pro A19.
Dynamic Island do të jetë më i vogël dhe i ngjashëm me atë të iPhone-ve aktualë, dhe korniza e tij metalike do të jetë prej një aliazh titani që përmban një përqindje më të ulët të titanit në krahasim me iPhone 17 Pro dhe iPhone 17 Pro Max.
Gjithashtu, iPhone 17 Slim do të marrë çipin 5G të Apple të vonuar prej kohësh dhe vetëm një kamerë të pasme. Është një hap i madh prapa kur bëhet fjalë për tendencat e celularëve, por Kuo thekson se Apple synon të theksojë formën inovative të dizajnit të iPhone 17 Slim në vend që të konkurrojë në specifikimet e harduerit. Me fjalë të tjera, pamja do të jetë “gjithçka”.
Ky është një “bixhoz” mjaft interesant nga ana e Apple, i cili mund të shpërblehet lehtësisht. Për të qenë i suksesshëm, iPhone 17 Slim duhet të përbëjë rreth 15 për qind të shitjeve totale të telefonave inteligjentë të Apple, dhe kjo do të ishte dy deri në tre herë më e suksesshme se modeli që zëvendëson.
