Aktorja e famshme, Pamela Anderson, ka shpërndarë planet e saj për të ndryshuar mbiemrin dhe për t’i dhënë vëmendje rrënjëve të saj finlandeze.
Në një intervistë për “Vogue Scandinavia”, ylli i njohur i “Baywatch” dhe “The Last Showgirl”, deklaroi se do të dëshironte të quhej Pamela Hyytiainen, mbiemri i gjyshit të saj, të cilin e ndryshoi kur emigroi në Kanada për t’u integruar më lehtë në shoqëri.
“Ndonjëherë nuk dua të jem Pamela Anderson, por Pamela Hyytiainen. Do të doja ta ndryshoja mbiemrin tim, por nuk më lejojnë,” tha 58-vjeçarja, duke theksuar lidhjen e veçantë që kishte me gjyshin e saj Herman Hyytiainen.
Ky i fundit jo vetëm që i mësoi finlandishten, por mbeti një figurë e rëndësishme në jetën e saj, edhe pas vdekjes së tij, kur Pamela ishte vetëm 11 vjeç.
Aktorja ka qenë gjithmonë e hapur ndaj eksplorimit të identitetit të saj, si në karrierë ashtu edhe në pamjen personale. Nga rolet si simbol seksi në “Baywatch”, te performanca e saj më e vonshme në “The Last Showgirl”, Anderson ka kaluar përmes transformimeve të shumta.
Në një intervistë me Marie Claire Greece, 58-vjeçarja shprehu se roli në filmin “The Last Showgirl” i dha mundësinë të rishikonte vendime të kaluara dhe të shprehte kreativitetin e saj në mënyrë të thellë, duke treguar pasion për artin dhe teatrot e autorëve të mëdhenj si Tennessee Williams dhe Eugene O’Neill.
