Kupa e Kombeve Afrikane (Afcon) ka një traditë të mbajtjes së saj gjatë muajve të dimrit, kryesisht janar dhe shkurt, për shkak të klimës së ndryshueshme në Afrikë.
Në disa vende, vera shoqërohet me stinë të reshjeve dhe nxehtësi ekstreme, gjë që mund të ndikojë në gjendjen e fushave dhe kushtet e lojës. Dimri, nga ana tjetër, ofron temperatura më të qëndrueshme dhe kushte më të thata, ideale për zhvillimin e ndeshjeve.
Edicioni i vitit 2023 në Bregun e Fildishtë ishte parashikuar të zhvillohej në verën e 2022-ës, por u shty për në fillim të vitit tjetër për shkak të kushteve atmosferike. Përveç kësaj, zhvillimi i Afcon në dimër ndihmon që të shmangen përplasjet me kompeticionet tjera ndërkombëtare që zakonisht zhvillohen në verë. Megjithatë, kjo ka krijuar tension me klubet evropiane, të cilat duhet të lirojnë lojtarët gjatë sezonit të tyre të rregullt.
Tradicionalisht, Afcon mbahet çdo dy vjet. Kur filloi në 1957, pjesëmarrja në Kupën e Botës nuk ishte e garantuar për skuadrat afrikane. Me kalimin e viteve, pjesëmarrja e vendeve afrikane në Kupën e Botës është rritur, ndërsa ritmi i dyvjetëshëm i Afcon ka siguruar stabilitet në të ardhurat nga turneu dhe turizmi, si dhe mundësi të vazhdueshme për ekipet dhe lojtarët për të konkurruar.
Megjithatë, në të ardhmen Afcon do të mbahet çdo katër vjet për t’u përshtatur me turnet tjera ndërkombëtarë. Në 2020, presidenti i FIFA-s, Gianni Infantino, propozoi këtë ndryshim te Konfederata e Futbollit Afrikan (CAF), duke sugjeruar gjithashtu që turneu të zhvillohet midis shtatorit dhe nëntorit.
Sipas njoftimit të bërë më 20 dhjetor nga presidenti i CAF, Patrice Motsepe, këto ndryshime synojnë të modernizojnë Afcon dhe ta bëjnë më të përshtatshëm për futbollin modern ndërkombëtar. /
