Në një kohë kur presioni social për të marrë pjesë në çdo aktivitet apo ngjarje është më i lartë se kurrë, ka një kategori njerëzish që zgjedhin të ecin kundër rrymës. Ata preferojnë një stil jetese që përfshin më shumë qetësi dhe vetmi, larg nga shoqëria dhe aktivitetet shoqërore që shumë i shohin si domosdoshmëri
Ky është fenomeni i njohur si ‘JOMO’ – Joy of Missing Out ose “Gëzimi i Mospjesëmarrjes”.
Por pse disa njerëz ndihen më të lumtur duke qëndruar larg grupit dhe aktiviteteve që të tjerët i ndjekin me përkushtim?
Çfarë është ‘JOMO’?
Ndryshe nga FOMO (Frika e Mospjesëmarrjes), ku individët ndihen të shqetësuar nëse nuk marrin pjesë në aktivitete, ‘JOMO’ përfaqëson kënaqësinë dhe paqen që vjen nga zgjedhja për të qëndruar jashtë një situate, për të kaluar kohën vetëm, ose për të zgjedhur një mënyrë të thjeshtë jetese pa stresin që sjellin takimet shoqërore.
Arsyet pse njerëzit zgjedhin ‘JOMO’
Një nga arsyet kryesore pse disa individë përqafojnë ‘JOMO’ është lodhja nga presioni social. Ata ndihen të mbingarkuar nga detyrimi për të qenë gjithmonë aktivë, për të shfaqur në rrjetet sociale çdo veprim dhe për të qëndruar vazhdimisht të angazhuar. Të qëndruarit larg grupeve u jep atyre kohën dhe hapësirën për t’u rilidhur me veten, për të rimbushur energjitë dhe për të përqafuar paqen e brendshme.
Një tjetër arsye është dëshira për t’u përqendruar në përvoja më të thella dhe kuptimplota. Njerëzit që përqafojnë ‘JOMO’-n, shpesh preferojnë aktivitete që i bëjnë të ndihen më të lidhur me vetveten, si leximi, meditim, ose kalimi i kohës në natyrë. Ata zgjedhin të jetojnë përvojat e tyre pa ndërhyrjen dhe presionin e të tjerëve.
A është ‘JOMO’ zgjedhje apo arratisje?
Shumë persona mund të mendojnë se njerëzit që zgjedhin ‘JOMO’ janë thjesht të ndrojtur ose të mbyllur në vetvete, por në të vërtetë, për shumë prej tyre është një zgjedhje e vetëdijshme për një mënyrë më të ekuilibruar jetese. Ata e dinë që duke thënë “jo” për disa aktivitete, po thonë “po” për më shumë kohë cilësore për veten, citon Anabel.
Paqja e brendshme është shpesh motivi kryesor. Në një botë që nxit të shfaqurit dhe ndarjen e çdo momenti, këta individë e vlerësojnë qetësinë dhe kënaqësinë që sjell të qëndruarit jashtë skenës. Ata nuk ndjejnë frikë se po humbin diçka, por përkundrazi, gjejnë kënaqësi në zgjedhjen e vetëpërmirësimit dhe kujdesit personal.
