Cristiano Ronaldo tashmë ka probleme te Al-Nassr. AFP thekson se sulmuesi ende nuk ka të drejtë të luajë, sepse skuadra saudite ka shumë lojtarë të huaj nën kontratë. Kjo u raportua nga agjencia franceze e lajmeve, pas bisedave me zyrtarë të vetë Al-Nassr, të cilët dëshirojnë të mbeten anonimë.
Al-Nassr ka numrin maksimal të lejuar prej tetë lojtarësh të huaj nën kontratë dhe Ronaldo është i nënti në skuadrën e klubit. Prandaj, portugezi mund të luajë vetëm nëse Al-Nassr shet një prej tyre. Sipas mediave të ndryshme të Arabisë Saudite, mesfushori uzbek, Jalaluddin Masharipov është ai që duhet t’i hapë rrugën pesë herë fituesit të “Topit të Artë”.
Duhet mbajtur mend se Ronaldo ka nënshkruar kontratë me Al-Nassr deri në verën e vitit 2025. Sipas disa burimeve, portugezi do të fitojë 200 milionë euro gjatë dy viteve e gjysmë të ardhshme. Ky numër mund të rritet ndjeshëm nëse Arabia Saudite lejohet të presë Kupën e Botës 2030 me mbështetjen e Ronaldos.
