Me rastin e 26-vjetorit të çlirimit të Pejës nga okupatori serb, Komuna e Pejës ka nderuar me titullin “Nderi i Qytetit” Presidentin e ‘Elkos Group-Etc’ dhe biznesmenin e fuqishëm kosovar Ramiz Kelmendin.
Titulli ka ardhur me motivacion për kontributin e jashtëzakonshëm në zhvillimin ekonomik, kulturor dhe sportiv të qytetit.
Kelmendi, emër i fuqishëm në zhvillim ekonomik shtetëror e rajonal, njihet si një nga biznesmenët që mbetet i lidhur emocionalisht me Pejën, ndërsa kompania e tij, si një prej kompanive me rol të fuqishëm në mbushjen e arkës së shtetit, duke u shpallur për vite rresht si tatimpaguesi më i mirë.
Me rastin e pranimit të titullit ‘Nderi i Qytetit’, Ramiz Kelmendi, që përpos biznesmen, edhe Deputet i Kuvendit të Republikës së Kosovës në disa legjislatura dhe ish/Zv/Kryeministër, ka shprehur falënderimin e tij në solemnitet.
“Faleminderit Amerikë, faleminderit NATO, faleminderit familja Rugova, faleminderit familja Haradinaj, faleminderit familja Jashari dhe faleminderit UÇK për Lirinë e Pejës dhe Kosovës dhe që ne sot, këtu në këtë shesh gëzojmë të lirë. Për titullin falënderoj kryetarin e komunës Gazmend Muhaxheri, Kryesuesin e Kuvendit Rexhep Kurtbogaj, Asambleistët dhe veçanërisht qytetarët e Pejës. Titullin ja dedikoj familjes time dhe bashkëpunëtorëve të mi. Jam i lumtur me këtë nderë por edhe me këto pamje të solemnitetit ku rinia jonë sonte gëzon e vallëzon. Unë dhe kolegët do të punojmë shumë, që kjo rini e mrekullueshme mos ta lërë Kosovën, por vendin ta shoh si mundësi për tu zhvilluar e shkolluar. Në fund, me këtë rast, duke ndjerë me këto festa të Lirisë, dua të bashkëndjejë me kreun e UÇK-së, që po mbahen në Gjykatën Speciale të Kosovës në Hagë. Shprehë bindjen dhe sigurinë time në pafajësinë e tyre dhe jam i prirë të besoi në vendime të drejta të kësaj Gjykate. Urime”, deklaroi Kelmendi me këtë rast.
Ndryshe, Komuna ka ndarë dekorata edhe për personalitete tjera të qytetit.
