Policia e Kosovës, përkatësisht Sektori i Hetimeve të Kryeqytetit, ka publikuar një kërkesë për bashkëpunim me qytetarët lidhur me një rast të veprës penale “vjedhje”.
Me autorizim të prokurorisë kompetente, hetuesit kanë shpërndarë fotografitë e dy personave të dyshuar, të cilët janë kapur nga kamerat e sigurisë dhe dyshohet se janë të përfshirë në rastin e vjedhjes.
Policia u bën thirrje qytetarëve që, nëse kanë çfarëdo informacioni që mund të ndihmojë në identifikimin e këtyre personave, të kontaktojnë organet e rendit përmes numrit të telefonit 192 apo përmes emailit zyrtar: [email protected].
“Bashkëpunimi i qytetarëve është kyç për zbulimin e autorëve të veprave penale dhe rritjen e sigurisë së përgjithshme,” thuhet në njoftimin e policisë.
Fotografitë e personave të dyshuar janë shpërndarë në faqet zyrtare dhe rrjetet sociale të Policisë së Kosovës.
Policia garanton anonimitetin e plotë të të gjithë qytetarëve që japin informacione.
