Policia e Kosovës ka njoftuar se po vazhdojnë hetimet për rastin e kërcënimit me mjet shpërthyes të ndodhur gjatë ditës së sotme në objektin e Kuvendit të Kosovës.
Sipas informacionit zyrtar të Policisë së Kosovës, kërcënimet dyshohet të kenë ardhur përmes një numri telefoni, i cili mund të ketë origjinën nga Serbia.
Njoftimi i plotë:
Informacion zyrtar
Prishtinë, 5 korrik 2025
Lidhur me rastin e kërcënimit me mjet shpërthyes, të ndodhur sot në orët e paraditës në objektin shtetëror të RKS-së, Policia e Kosovës në bashkëpunim dhe koordinim me institucionet e sigurisë, ka vazhduar hetimet intensive, me qëllim të ndriqimit dhe zbulimit të kërcënimit.
Bazuar në hetimet e deritanishme, dyshohet se kërcënimet kanë ardhur përmes një numri të telefonit i cili dyshohet se është nga Serbia.
Policia në bashkëpunim me prokurorinë kompetente do të vazhdojë hetimet e mëtejme, duke marrur të gjitha masat hetimore, përfshirë edhe komunikimet me partnerë ndërkombëtar të sigurisë, për të lokalizuar mjetet, rrjetet e komunikimit që janë përdoruar në këtë kërcënim.
